Komandamızın “Neftçi” ilə oyunlarının yeri dəyişdirilib. Bu barədə qərarı PFL verib.
Buna “Neftçi”nin ev oyunlarını keçirdiyi “Neftçi Arena”da təmir və yenidənqurma işləri başa çatmamağı səbəb olub. Klub 7-ci turda “Qarabağ”a qarşı keçirəcəyi ev oyununun məkanının dəyişdirilməsi ilə bağlı PFL-ə rəsmi müraciət edib.
“Neftçi Arena”da aparılan təmir işlərinin yekunlaşmadığını, “Neftçi”nin rəsmi müraciətini, “Qarabağ”ın rəsmi razılığını rəhbər tutan qurum aşağıdakı qərarları qəbul edib:
Misli Premyer Liqasının 7-ci turunun “Neftçi” - “Qarabağ” oyunu ilə 15-ci turun “Qarabağ” - “Neftçi” oyununun yeri dəyişdirilsin.
7-ci turun “Qarabağ” - “Neftçi” oyunu 20 sentyabr saat 20:00-da “Azersun Arena”da oynanılsın.
Klubların əvəzedici heyətləri arasında baş tutacaq oyunların proqramı əvvəlcədən açıqlandığı kimi saxlanılsın.
